Торайғыров университетінде инженерлік, қайта өңдеу, жаратылыстану және ауыл шаруашылығы бағыттары бойынша Инновациялық білім беру бағдарламаларын әзірлеу бойынша жұмыс берушілермен кездесу өтті.

Кәсіпорындар мен ұйымдардың, университеттің академиялық қызметтерінің өкілдері, білім беру бағдарламаларын әзірлеушілер Қазақстанның және Павлодар облысының еңбек нарығының перспективаларын, атап айтқанда, кәсіпорындар тарапынан университет түлектеріне қойылатын жаңа талаптарды, жобалық және дуальды оқыту, тағылымдамадан өту және кәсіпорындарда одан әрі жұмысқа орналасу мүмкіндігін талқылады.

ЖОО-ның Академиялық мәселелер жөніндегі басқарма мүшесі Петр Быков Торайғыров университеті 2023 жылы жаңа инновациялық бағдарламаларға қабылдауды бастағанын атап өтті. Бұл "Технологиялық жабдықтың болжамды диагностикасы", "Агроэкология", "Биология және кинезиология", "Энергоменеджмент", "Металлургия және қайта өңдеу", сондай-ақ "Урбанистика және аумақтарды дамыту".

Диалогқа ірі өнеркәсіптік кәсіпорындардың, фермерлік шаруашылықтардың және мемлекеттік органдардың өкілдері қатысты. ToU-да жұмыс берушілермен ынтымақтастық Еуропалық Одақтың қолдауымен "Erasmus+" жобасы бойынша жүргізіледі, ол "Орталық Азияда түлектерді жұмысқа орналастыру үшін жағдай жасау арқылы студенттердің инновациялық тәсілдері мен кәсіпкерлік дағдыларын ынталандыру - Trigger"деп аталады.